Subay sa plataporma de gobyerno sa kasamtangang pamunoan nga SERVICES, diin ang “S” nagpunting sa “Services excellence and professionalism of human resources,” nanumpa atubangan ni Mayor Jorjan “Monet” B. Federiso ang 247 ka-empleyado sa munisipyo atol sa pagsaulog ika-121 nga kasumaran sa serbisyong sibil sa tibuok nasud.

Mahinungdanon ang maong selebrasyon tungod kay walay empleyado nga nangatanggal apan nadugangan hinuon ug nangaplastar sa insaktong posisyon.

“Dako kaayo ang inyong nahatag kanamo nga mga opisyales sa lungsod kay kung dili tungod kaninyo dili namo mapaabot sa katawhan ang tulay sa kauswagan,” asoy ni Mayor Monet ngadto sa mga kawani sa gobyerno.

Mipataas sa ilang tuong kamot aron manumpa nga ihatag ang ilang nindot nga pagserbisyo sa mga New Corellahanon ang 20 ka-bag-ong nadawat, 25 ka-personahe nga misaka ang posisyon, 22 casual workers, 124 job order, 8 contract of service, ug 47 honorarium-based.

Gihagit usab sa opisyal ang mga kawani nga motrabaho og ensakto aron mahimuot ang katawhan nga ginaserbisyohan.
“Ampingi ug tarunga ninyo ang inyong trabaho kay swerte na kaayo mo nga nahatagan mo og higayon nga makatrabaho sa munisipyo. Usa mo sa mga trabahante nga wala naapektuhan ang pagpanarbaho tungod sa COVID-19,” pahimangno sa nasangpit nga opisyal.

Gipanghinaot usab sa mga opisyales nga usabon sa mga empleyado ang ilang mga mali nga binuhatan sa mga milabay’ng mga bulan ug ipadayon ang saktong pagpanarbaho hangtud anaa pa sila sa serbisyo.

Gipasabot usab sa mayora ang mga wala napromote nga maningkamot lang tungod kay ang Federiso-Lagumbay administration nagalantaw sa ilang mga kakugi.

Gipaningkamotan usab sa kasamtangang administrasyon nga mahatagan og insaktong kalipayon ang mga empleyado sa umaabot nga pasko.

“Akong dakong pagsaludo kaninyo, mabuhay ang tanang civil servants. Salamat kaayo sa paghatag kanamo og dugang inspirasyon nga motunol sa tinuod nga serbisyo,” panapos ni Mayor Monet.

#247EmpleyadoNanumpa
#TrabahanteSaGobyernoWalaGipasagdan
#TinuodNgaSerbisyoLoveKo