“Ang gobyerno karon wala nagpakabuta-bungol. Tabangan gyud mo sa gobyerno” – Mayor Monet

Tipik sa pamahayag ni Mayor Jorjan “Monet” B. Federiso atol sa gipahitabong Area Clearing Evaluation (ACE) karong hapon, human sa engkwentro tali sa militar ug rebelde sa may Brgy. Sto. Niño, New Corella, Davao Del Norte niadtong Sabado.

Giluwatan sa mayora ang mensahe agi og awhag sa mga rebelde ug masa nga magbalik-loob sa gobyerno kay daghang programang pangkalamboan ang naghulat kanila.

Gani, usa sa inisyatibo nga gibalandra ni Mayor Monet nga tabang sa panggamhanan, mao ang programang Poverty Alleviation and Development for Rural Economy (PADRE).

Magsilbi usab ang PADRE nga tubag sa panawagan sa gobyernong nasyunal nga tuldokan na ang armadong pakigbisog sa mga komunistang teroristang grupo pinasikad sa Executive Order No. 70 ni Presidente Rodrigo Roa Duterte, nga Ending Local Communist Armed Conflict (ELCAC).

Makatabang ang PADRE aron makabaton og malahutayong panginabuhian ang yanong katawhan, ug sa ingon matunhay ang kalinaw ug kalamboang ginahandum sa tanan.

Gipasalig usab sa mayora ang hugot niining suporta ngadto sa kasundalohan ug kapulisan sa maong tumong ug tinguha.
“Rest assured nga ang Federiso-Lagumbay Administration mosuporta gayud sa mga programa ug kalihukan sa AFP ug PNP,” butyag ni Mayor Monet samtang malaomon usab sa ilang suporta nganha sa iyang pagdumala.
Buot sa opisyal nga hingusgan ang purok consultations ug DUAW sa matag-barangay sa tuig 2021, ug gidapit ang ilang partisipasyon.

Mitambong sa ebalwasyon sila PLTCOL Julius Borja, DPDA sa Davao Del Norte Police Office, ug COL Glenn Jun Calambuhay INF (GSC) PA, deputy brigade commander sa 1001st Pag-asa Brigade.