Lahi ra gayud ang New Corella sa Davao Del Norte karon tungod sa mga pag-ila ug pasidungog gikan sa nagkadaiyang ahensya sa gobyerno, ug pribadong institusyon.

Sa matang sa pagdumala sa pampublikong panudlanan, nakapasa ang munisipyo sa Good Financial Housekeeping sumala sa Department of Interior and Local Government (DILG) niadtong Disyembre 2021.

Kabahin sa rice program, gipasidunggan usab sa Department of Agriculture (DA) ang lungsod isip Davao Best LGU sa large scale category.
Samtang naharbat niini ang 1st Over-All Most Competitive Municipality gikan sa Department of Trade and Industry (DTI) sa probinsya sa pakig-alayon sa Kagamhanang Lokal sa Davao Del Norte tungod sa nindot nga imprastraktura, buhing ekonomiya, ug lig-ong polisiya alang sa kahapsay ug kalinaw.
Gitak-opan ni Mayor Monet Federiso ang tuig 2021 nga puno sa pagpasalamat ug paglaum sa dihang lakip siya sa mga gipasidunggan isip Outstanding Public Servant sa NGO TV Network tungod sa programang Poverty Alleviation and Development for Rural Economy (PADRE), diin 139 na ka-pundok o 3,475 pamilya ang nakabenepisyo sukad Marso 2022.

Ug niining bag-ohay, gidawat ni Mayor Monet ang Gawad Paglilingkod sa Sambayanan (GAPAS) Award gikan sa Department of Social Welfare and Development (DSWD), sa Davao City, niadtong Abril 11, 2022 sa hapon.

Giila sa DSWD ang munisipalidad isip Model LGU sa pagpatuman niini sa mga proyekto ubos sa KALAHI-CIDSS sa tuig 2021 atol sa seremonyas sa PaNaTa ko sa Bayan Awards, uban sa Tagum City sa susamang lalawigan.

Nakadayeg ang DSWD sa administrasyon ni Mayor Monet tungod kay gipatuman niini ang tulo ka-modalities sa KALAHI sama sa IP Pamana, Additional Financing ug Balik Probinsya Bagong Pag-asa (BP2) programa.

Matag-modality nagkinahanglan og pundo agi og counterpart sa lokal, apan walay duhaduhang gidawat sa mayora ang mga programa, ug gihangyo si Vice Mayor Jun Lagumbay sa pagpanday og balaodnon alang sa paggahin sa gikinahanglang badyet.

“Timailhan kini sa atong tinud-anay nga panerbisyo ug kahiusahan alang sa pagreporma sa atong komunidad aron mausab ang kahimtang sa yanong katawhan“

libkas ni Mayor Monet sa iyang pagkupot sa award.

Mikabat na sa dul-an P49.4 milyon ang nasungkit nga pundo gikan sa gobyernong nasyunal para sa KALAHI proyekto sulod sa tuig 2020-2021, sama sa:

1. IP PAMANA (2020-2021)
   1. Cycle 1 @ P5.67 milyon para sa Tog’gan Centers, IP Cultural Centers, ug pagbansay sa bamboo products sa Brgys. El Salvador, Patrocenio, Mambing, Sta. Fe, Del Monte, Cabidianan ug Limbaan;
   2. Cycle 2 @ P3.97 milyon alang sa solar homelights sa Brgys. El Salvador, Mambing, Sta. Fe, Cabidianan, Limbaan, Del Monte, ug pre-school building sa Patrocenio;
   3. Cycle 3 @ P6.1milyon para sa mga gambalay sa multi-purpose, tog’gan, school for living tradition ug activity center sa Brgys. New Bohol, Carcor, San Jose, New Cortez, Limbaan ug Mambing;
2. Additional Financing (2021-2022)
   1. Phase 1 @ P22.4 milyon alang sa laing gambalay nga itukod karong tuiga sama sa multi-purpose, isolation unit, ug health station sa Brgys. Mesaoy, Del Pilar, San Roque, Sra. Cruz, New Sambog, Macgum, Sto. Niño, ug Poblacion;
3. BP2 program (2021-2022)
   1. Unang batch @ P2.33 milyon, diin 24 benepisyaryong pamilya ang miuli na ug natagaan livelihood grant balor P50,000.00 ug transitory support @ P47,000.00 matag-pamilya;
   2. Ikaduhang batch @ 1.46 milyon sa lain na pod nga 15 pamilya sa susamang tabang kantidad P97,000.00 matag-benepisyaryo; ug
   3. Community-Driven Developement (CDD) grant @ P7.5 milyon para sa pagpalit og kagamitang medikal ug personal protective equipment nga pagagamiton sa ginatukod nga Infirmary Hospital sa Purok 5 Poblacion.

Dako usab ang iyang pasalamat sa regional ug municipal coordinating teams nga kuging nagalihok para han-ay ug paspas ang implementasyon, mga benepisyaryong barangay ug sektor, ug uban pang lumilihok sa programa.

Nahisubay kini sa platapormang SERVICES, diin ang “V” nagkanayon “Vulnerable and marginalized sectors empowerment” nga haum sa prinsipyo sa KALAHI.

Gilakip sa administrasyong Federiso-Lagumbay ang turismo sa kalamboang agenda isip rason sa pagpanindot sa New Corella, Davao del Norte.
Nasuta sa mga opisyales nga dapat adunay dugang atraksyon alang sa mga turista nga makita dayon sa ilang pagsulod pa lang sa lungsod, hinungdan nga nagtukod kini og mga dugang landmarks gikan mismo sa lokal nga panudlanan sa munisipyo.

Tungod sa maong proyekto, padayong mikita ang mga yanong negosyanteng New Corellahanon ilabi na kadtong mga nahimutang duol sa mga lugar laaganan taliwala sa pandemyang COVID-19.
\
Nahimo usab nga dahilan ang maong mga proyekto sa pagkabuhi balik sa ekonomiya human malusno tungod sa dautang epekto sa pandemya.
Sa kasamtangan, walay hunong ang mga opisyales sa pagmontar sa mga proyekto sa kabarangayan aron walay barangay nga mabiyaan.

Nakab-ot sa katawhan ang kalampusan sulod lamang sa hapit tulo ka-tuig sa unang termino sa pamunoan, kinsa mipasalig nga magpadayon kini hangtud anaa pa sila sa posisyon.

Gilantaw sa kagamhanan nga mahimong premyadong suroyanan ang New Corella sa tibuok rehiyon.

Mayor Monet Federiso as Outstanding Public Servant of 2021, while LGU as 1st Overall Competitive Municipality in Davao Del Norte, Davao Best LGU in rice program, & Good Financial Housekeeping by DILG

Papas na sa listahan ang pangalan sa 75 ka-persons who used drugs (PWUD’s) sa Brgy. Mesaoy, ug laing 10 sa Brgy. Poblacion, New Corella, Davao del Norte.

Kini human sila mitapos sa gipahigayong Community-Based Rehabilitation Program (CBRP) sa hiniusang lihok sa gobyernong nasyunal ug panggamhanang lokal.

Pinaagi sa pagpanguna sa Philippine Drug Enforcement Agency (PDEA), kauban ang Municipal Anti-Drug Abused Council (MADAC), New Corella Police Station (NCPS), ug Municipal Health Office (MHO), nagmaya ang nasangpit nga PWUD’s kay sulod lamang sa tulo ka-Sabado sa bulan sa Marso nahuman ang ilang rehabilitasyon.

Gipamatud-an sa mga PWUD’s ang ilang hugot nga pagreporma sa kaugalingon pinaagi sa pag-undang na sa paggamit ug pagpamaligya sa ginadiling druga.
Tumong sa maong kalihokan nga mabalik ang insaktong dungog ug moral sa mga PWUDs sa katilingban ug mahatagan sila og mga higayon nga maangkon og mga benepisyo gikan sa gobyerno.

Sa iyang mensahe, buot usab ni Mayor Monet Federiso nga makabaton sila og kahanas pinaagi sa skills training o panginabuhian pinaagi sa Poverty Alleviation and Development for Rural Economy (PADRE).

Ang Mesaoy maoy ika-13 nga barangay alang sa maong CBRP, ug ang nahibiling pito tuyokon na lamang sa MADAC uban sa koordinasyon sa BADAC.
Tinguha sa Administrasyong Federiso-Lagumbay nga mahimong drug-cleared ang lungsod aron magpadayon ang kahapsay ug kalinaw sa komunidad ug mahatagan og nindot nga kaugmaon ang mga narepormang PWUD’s.

Malampusong natuyok sa administrasyong Federiso-Lagumbay ang 20 ka-barangay sa New Corella, Davao del Norte aron sa paghatod ug pagtunol sa bugas alang sa tanang pamilyang New Corellahanon.

Misugod sa paglibot ang distribution team sa kabarangayan sugod niadtong Marso 9, dala ang tinag-lima ka-kilong bugas nga nakagahin sa matag-pamilya pinaagi sa pagpanguna nila Mayor Jorjan “Monet” B. Federiso ug Vice Mayor Pedro “Jun” H. Lagumbay Jr., kauban ang mga konsehales ug mga nagkadaiyang departamento sa munisipyo.

Ang Municipal Social Welfare and Development Office (MSWDO) ug Municipal Disaster Risk Reduction and Management Office (MDRRMO) maoy nakatoka sa pagpasilitar ug paglista sa mga benepisyaryo.

Subay sa gipagilang datos sa MSWDO ug MDRRMO, mikabat sa 17,820 ka-pamilya ang malipayong midawat sa 1-6-0 nga bugas.

Ang maong ayuda inisyatibo sa kasamtangang pamunoan isip post-calamity sa nahitabong sagunsong pag-ulan ug kabahin sa pagsigurong walay magutman panahon sa pandemya.

“Para ni sa tanan, walay pili ang atong paghatag, miyembro man o dili sa purok, ug bisan pila ka-pamilya ang ipon sa usa ka-bubong tungod kay kitang tanan apektado,” pasabot ni Mayor Monet.

Maoy tuyo sa mga opisyales nga mabati sa yanong tagi-lungsod nga adunay gobyernong tinuod nga nagmahal ug nag-atiman kanila.

Balik arangkada ang administrasyong Federiso-Lagumbay sa pagpanghatag og mga gamit alang sa mga nagkadaiyang pampublikong tulonghaan sa New Corella, Davao del Norte.

Subay sa mando ni Mayor Jorjan “Monet” B. Federiso milibot ang mga kawani sa panggamhanan sa pagpanguna ni Wendilyn Brandino, human resource management officer (HRMO), aron sa pagtunol sa tabang materyal ngadto sa mga eskwelahan.

Bitbit sa mga distribution team ang mga bond papers, laptop, printer, ug ink nga makahatag og dakong tabang ngadto sa mga magtutudlo sa ilang pagbuhat og mga modules.

Tinguha sa kasamtangang pamunoan nga mapaabot ngadto sa mga estudyante ang dekalidad nga edukasyon taliwala sa padayong pagkuyanap sa pandemya pinaagi sa pagpaabot og suporta sa mga magtutudlo, ug paghatag kanila sa mga gamit pang-edukasyon.
Bag-ohay lamang nakadawat ang mga mosunod nga mga benepisyaryong tulunghaan:

1. Silangan Elementary School;
2. San Roque Elementary School;
3. New Sambog Elementary School;
4. Macgum Integrated School; ug,
5. Saug Elementary School

Kasamtangan nagpadayon sa pagpahatod ang mga opisyales sa gamit ngadto sa mga eskwelahang pang-gobyerno subay sa gipagulang eskedyul sa unang kwarter sa tuig.

Nakigduyog ang pamunoang Federiso-Lagumbay sa Panggamhanang Lokal sa New Corella Davao Del Norte sa pagsaulog Elderly Filipino Week 2021 sugod niadtong Oktubre 1-7 pinasikad sa temang “Healthy and Productive Ageing Starts with me”.
Gipangunahan sa National Commission of Senior Citizen (NCSC) ang maong selebrasyon nga gisangon sa Depertment of Social Welfare and Development (DSWD) pinaagi sa pakigtambayong sa lokal ug nasyonal nga panggamhanan.

Kasamtangan gidumala sa buhatan sa Municipal Social Welfare and Development Office (MSWDO) ang pundok sa mga katigulangang New Corellahanon o Senior Citizen Sector.

Sa padayon nga pagkuyanap sa sakit nga COVID-19 ug subay sa mando sa Inter-Agency Task Force gilimitahan ang mga apohan nga mogawas sa ilang mga panimalay aron malikay nga matakdan sa nasangpit nga sakit.
Tungod niini walay nadalit ang lokal nga panggamhanan nga mga aktibidadis alang sa mga lolo ug lola sa lungsod.
Bisan paman, gipasalamatan gihapon sila sa mga opisyales sa ilang mga nahatag ug nabuhat alang sa kalamboan sa New Corella.

Isip pakighiusa sa administrasyon selebrasyon nagpabuhat kini og tarpaulin human gihikyad atubangan sa munisipyo.

#ElderlyWeekGisaulog
#FederisoLagumbayAdministration

Midan-ag ang panagway sa mga miyembro sa Barangay San Jose Small Farmers Association (BASASFA) tungod sa kalipay human sila mikita og kantidad P28,848.04 sa ilang negosyong pagbuhi og Tilapya.

Mapahiyomong giani sa BASASFA ang ilang binuhing isda nga mikabat og 240.04 ka-kilo sa Brgy. San Jose.
Kahinumdoman nga giorganisa ang BASASFA sa kasundalohang sakop sa 25th Infantry Battalion (IB) sa pagpanguna ni 1LT Marlo Bastasa, niadtong Hunyo 2020.

Human maandam ang maong pundok, giindorso kini sa 25th IB kay Mayor Monet Federiso alang sa programang Poverty Alleviation and Development for Rural Economy (PADRE).

Nakita sa mga yanong mag-uuma sa BASASFA nga ang pagpangisda mao ang silbing tulay nila aron makalingkawas sa kalisud ug makab-ot ang tiunay nga kalamboan.

Gidawat sa nahisgutang grupo ang kantidad P50,000.00 aron magamit sa ilang napiling panginabuhian niadtong bulan sa Agosto 2020.

Dako ang pasalamat sa mga benepisyaryo tungod sa dakong gihatag kanila sa gobyerno, ug mipasalig usab sila nga suportahan ang mithi sa pamunoan nga makab-ot ang kauswagan.

Nahisubay kini sa plataporma de gobyerno sa pamunoang Federiso-Lagumbay nga “SERVICES”, diin ang katapusang “S” nagkanayon “Sustainable livelihood and entrepreneuship” alang sa pamilyang New Corellahanon.
Courtesy: 25th Infantry Fireball Battalion

Ulan, init ug abog! Pipila lamang kana sa mga pagsulay nga ginaatubang sa mga Community Organizers (CO) sa programang Poverty Alleviation and Development for Rural Economy (PADRE) aron lang mapaabot sa katawhan ang kalamboan.

Padayong ginapakuyanap sa kasamtangang pamunoan ang kauswagan ngadto sa nagkadaiyang dapit sa New Corella, Davao Del Norte.

Punting sa Federiso-Lagumbay administration nga makahatag og dugang kapangwartahan ngadto sa mga lumulopyo sa komunidad ilabi na kadtong mga anaa sa Timberland areas.

Subay sa programang PADRE, makadawat ang kwalipikadong pundok og pasiunang kapital sa ilang nauyonang panginabuhian.
Naangkon sa mga organisasyanon sa kabukiran ang kantidad P50,000.00 aron masugdan ang ilang negosyo.
Mosunod ang benepisyaryong pundok sa hilit nga dapit, kansang opisyales ug miyembro midawat sa nasangpit nga kantidad Martes sa buntag:

1. Tindahan Alang Sa Malahutayong Kapanginabuhian Asosasyon sa mga Mag-uuma (TASMAKA-ASM) sa Purok 9, Brgy. Mambing; ug
2. Tigama Agricultur Supply Association (TASA) sa Purok 9, Tigama, Brgy. Cabidianan.
   Walay makababag sa kagamhanan sa pagtabang sa pamilyang New Corellahanon pinaagi sa PADRE, ang tulay sa paghaw-as kanila sa kalisud.

Gipasalig ni Mayor Jorjan “Monet” B. Federiso nga dili pasagdan ang mga benepisyaryo ug iyang tabangan nga mapalambo ang ilang negosyo.

Personal nga gipahatud sa mayora ang maong salapi pinaagi kang Executice Assistant Rolando B. Tumamac, kauban ang mga kawani sa gobyerno, atol sa ika-121 nga kasaulogan sa serbisyong sibil.