Balik arangkada ang administrasyong Federiso-Lagumbay sa pagpanghatag og mga gamit alang sa mga nagkadaiyang pampublikong tulonghaan sa New Corella, Davao del Norte.

Subay sa mando ni Mayor Jorjan “Monet” B. Federiso milibot ang mga kawani sa panggamhanan sa pagpanguna ni Wendilyn Brandino, human resource management officer (HRMO), aron sa pagtunol sa tabang materyal ngadto sa mga eskwelahan.

Bitbit sa mga distribution team ang mga bond papers, laptop, printer, ug ink nga makahatag og dakong tabang ngadto sa mga magtutudlo sa ilang pagbuhat og mga modules.

Tinguha sa kasamtangang pamunoan nga mapaabot ngadto sa mga estudyante ang dekalidad nga edukasyon taliwala sa padayong pagkuyanap sa pandemya pinaagi sa pagpaabot og suporta sa mga magtutudlo, ug paghatag kanila sa mga gamit pang-edukasyon.
Bag-ohay lamang nakadawat ang mga mosunod nga mga benepisyaryong tulunghaan:

1. Silangan Elementary School;
2. San Roque Elementary School;
3. New Sambog Elementary School;
4. Macgum Integrated School; ug,
5. Saug Elementary School

Kasamtangan nagpadayon sa pagpahatod ang mga opisyales sa gamit ngadto sa mga eskwelahang pang-gobyerno subay sa gipagulang eskedyul sa unang kwarter sa tuig.

Nakigduyog ang pamunoang Federiso-Lagumbay sa Panggamhanang Lokal sa New Corella Davao Del Norte sa pagsaulog Elderly Filipino Week 2021 sugod niadtong Oktubre 1-7 pinasikad sa temang “Healthy and Productive Ageing Starts with me”.
Gipangunahan sa National Commission of Senior Citizen (NCSC) ang maong selebrasyon nga gisangon sa Depertment of Social Welfare and Development (DSWD) pinaagi sa pakigtambayong sa lokal ug nasyonal nga panggamhanan.

Kasamtangan gidumala sa buhatan sa Municipal Social Welfare and Development Office (MSWDO) ang pundok sa mga katigulangang New Corellahanon o Senior Citizen Sector.

Sa padayon nga pagkuyanap sa sakit nga COVID-19 ug subay sa mando sa Inter-Agency Task Force gilimitahan ang mga apohan nga mogawas sa ilang mga panimalay aron malikay nga matakdan sa nasangpit nga sakit.
Tungod niini walay nadalit ang lokal nga panggamhanan nga mga aktibidadis alang sa mga lolo ug lola sa lungsod.
Bisan paman, gipasalamatan gihapon sila sa mga opisyales sa ilang mga nahatag ug nabuhat alang sa kalamboan sa New Corella.

Isip pakighiusa sa administrasyon selebrasyon nagpabuhat kini og tarpaulin human gihikyad atubangan sa munisipyo.

#ElderlyWeekGisaulog
#FederisoLagumbayAdministration

Midan-ag ang panagway sa mga miyembro sa Barangay San Jose Small Farmers Association (BASASFA) tungod sa kalipay human sila mikita og kantidad P28,848.04 sa ilang negosyong pagbuhi og Tilapya.

Mapahiyomong giani sa BASASFA ang ilang binuhing isda nga mikabat og 240.04 ka-kilo sa Brgy. San Jose.
Kahinumdoman nga giorganisa ang BASASFA sa kasundalohang sakop sa 25th Infantry Battalion (IB) sa pagpanguna ni 1LT Marlo Bastasa, niadtong Hunyo 2020.

Human maandam ang maong pundok, giindorso kini sa 25th IB kay Mayor Monet Federiso alang sa programang Poverty Alleviation and Development for Rural Economy (PADRE).

Nakita sa mga yanong mag-uuma sa BASASFA nga ang pagpangisda mao ang silbing tulay nila aron makalingkawas sa kalisud ug makab-ot ang tiunay nga kalamboan.

Gidawat sa nahisgutang grupo ang kantidad P50,000.00 aron magamit sa ilang napiling panginabuhian niadtong bulan sa Agosto 2020.

Dako ang pasalamat sa mga benepisyaryo tungod sa dakong gihatag kanila sa gobyerno, ug mipasalig usab sila nga suportahan ang mithi sa pamunoan nga makab-ot ang kauswagan.

Nahisubay kini sa plataporma de gobyerno sa pamunoang Federiso-Lagumbay nga “SERVICES”, diin ang katapusang “S” nagkanayon “Sustainable livelihood and entrepreneuship” alang sa pamilyang New Corellahanon.
Courtesy: 25th Infantry Fireball Battalion

Ulan, init ug abog! Pipila lamang kana sa mga pagsulay nga ginaatubang sa mga Community Organizers (CO) sa programang Poverty Alleviation and Development for Rural Economy (PADRE) aron lang mapaabot sa katawhan ang kalamboan.

Padayong ginapakuyanap sa kasamtangang pamunoan ang kauswagan ngadto sa nagkadaiyang dapit sa New Corella, Davao Del Norte.

Punting sa Federiso-Lagumbay administration nga makahatag og dugang kapangwartahan ngadto sa mga lumulopyo sa komunidad ilabi na kadtong mga anaa sa Timberland areas.

Subay sa programang PADRE, makadawat ang kwalipikadong pundok og pasiunang kapital sa ilang nauyonang panginabuhian.
Naangkon sa mga organisasyanon sa kabukiran ang kantidad P50,000.00 aron masugdan ang ilang negosyo.
Mosunod ang benepisyaryong pundok sa hilit nga dapit, kansang opisyales ug miyembro midawat sa nasangpit nga kantidad Martes sa buntag:

1. Tindahan Alang Sa Malahutayong Kapanginabuhian Asosasyon sa mga Mag-uuma (TASMAKA-ASM) sa Purok 9, Brgy. Mambing; ug
2. Tigama Agricultur Supply Association (TASA) sa Purok 9, Tigama, Brgy. Cabidianan.
   Walay makababag sa kagamhanan sa pagtabang sa pamilyang New Corellahanon pinaagi sa PADRE, ang tulay sa paghaw-as kanila sa kalisud.

Gipasalig ni Mayor Jorjan “Monet” B. Federiso nga dili pasagdan ang mga benepisyaryo ug iyang tabangan nga mapalambo ang ilang negosyo.

Personal nga gipahatud sa mayora ang maong salapi pinaagi kang Executice Assistant Rolando B. Tumamac, kauban ang mga kawani sa gobyerno, atol sa ika-121 nga kasaulogan sa serbisyong sibil.

“Salamat kaayo sa inyong kakugi, tungod niini napaabot nato sa katawhan ang tinuod nga serbisyo,’’ pahayag ni Mayor Monet Federiso ngadto sa mga empleyado sa munisipyo.

Giila sa pamunoang Federiso-Lagumbay ang dedikasyon sa mga kawani sa Lokal nga Panggamhanan sa New Corella, Davalo Del Norte, hinungdan gipaabot sa mga opisyales ang ilang dakong pagpasalamat ngadto sa mga trabahante kay kabahin sila sa kalampusang nakab-ot sa administrasyon sa tuig 2021.

Taliwala sa padayon nga paghapak sa negatibong epekto sa pandemyang COVID-19, dasig nga nagatrabaho ang mga empleyado aron mapaabot ngadto sa mga pamilyang New Corellahanon ang tinud-anay nga serbisyo.

“Dako kaayo ang inyong nahatag nga tabang ug suporta kanamo kay kung wala mo dili namo makaya nga mobarog sa pagpanerbisyo sa mga tawo,” saysay ni Mayor Monet.

Gilibkas sa mayora ang maong mensahe atol sa gipahitabong Monday convocation ug flag raising ceremony atubangan sa mga kawani, Lunes sa buntag.

“Dili mo namo pasagdan ug paniguradohon namo nga dili masayang ang inyong kahago,” panapos sa mayora.
Ang nahisgutang kalihukan kabahin sa ika-121 nga anibersaryo sa Philippine Civil Service sa bulan sa Setyembre, ubos sa temang “Transforming public service in the next decade: honing agile and future-ready servant-heroes.”

Pinasikad sa kalamboang agenda sa Federiso-Lagumbay administration nga SERVICES, walay hunong ang pagsulbad sa mga katilingbanong problema ug pagpahamtang sa mga reporma alang sa pamilyang New Corellahanon.

Ulan man o init dili mapugngan ang pagpangalagad sa kasamtangang opisyales ngadto sa katawhan, ilabi na niadtong sektor nga napadaplin sa komunidad.

Usa sa mga programa nga ginahatagan og prayuridad sa kagamhanan mao ang pagpahigayon og konsultasyon ngadto sa kapurokan sa lungsod.

Personal nga ginasuroy nila Mayor Jorjan “Monet” B. Federiso ug Vice Mayor Pedro “Jun” H. Lagumbay Jr., kauban ang mga konsehales, ang matag-purok alang sa dayalogo.

Bag-ohay lamang gibisita sa mga opisyales ang Purok 1, 3 ug 4 sa Brgy. Sta. Fe, diin nahinabi ang mga miyembro labot sa ilang mga planong kalamboan.

Sa walay paglangay, gipahatud nila Mayor Monet ug Vice Mayor Jun ang mga gipangayong materyales para sa purok centers, Huwebes sa buntag.

Gipasalig sab sa Mayora nga samtang anaa pa sila sa serbisyo dili sila mo-undang sa pagpabati sa ilang gugma ngadto sa katawhan.

“Hangtud naa pa mi sa posisyon dili mi mo-undang sa pagtabang kaninyo,” butyag ni Mayor Monet.
Malipayong gidawat sa mga purok leaders ang ayudang materyales ug mipaabot sa ilang dakong pagpasalamat sa pamunoan.
Matud pa sa usa sa mga benepisyaryo nga suportahan gyud nila ang mithi ug lakang sa gobyerno alang sa padayong pag-aginod ngadto sa kauswagan.

Sa laing bahin, giawhag ni Mayor Monet ang publiko nga mo-apil sa Poverty Alleviation and Development for Rural Economy (PADRE) para sa panginabuhian ug dugang kapaninguhaan.

Malampusong natunol sa Lokal nga Panggamhanan sa New Corella, Davao Del Norte ang Special Risk Allowance (SRA) ngadto sa 278 ka-health workers sa barangay.

Ang SRA gikan sa pundo sa Department of Health (DOH).
Gilangkuban kini sa 236 ka-Barangay Health Workers (BHW), 22 ka-Barangay Nutrition Scholar (BNS), ug 20 ka-Barangay Sanitary Inspectors (BSI).

Mismong si Mayor Jorjan “Monet” B. Federiso ang nagpahatud sa nahisgutang ayuda kantidad P2,900.00 matag-usa.
Pinaagi kang Executive Assistant Rolando B. Tumama, kauban si BHW President Remedios Patana, nahatag ang maong salapi ngadto sa mga health workers.

Sa simpleng pamaagi, napaabot sa kasamtangang administrasyon ang ilang dakong pagpasalamat ug pasidungog ngadto sa mga kawaning frontliners sa ilang pagserbisyo panahon sa pandemya.

Mipaabot sab ang mga benepisyaryo sa ilang dakong pagpasalamat ngadto sa DOH ug sa Federiso-Lagumbay administration tungod kay wala sila pasagdi sa ilang pakigbisog nga mapugngan ang pagkuyanap sa sakit COVID-19.

Samtang giagni ni Mayor Monet ang mga BHW, BNS, ug BSI nga moduol lang kaniya ug kang bisan kinsang opisyales kung aduna man silay panginahanglanon kabahin sa pagpanarbaho aron kini masolusyonan.

Gipang-apuran sa mga sakop sa New Corella Davao North Eagles Club (NEDNEC) kon Agila ang katawhan sa upat ka-barangay sa New Corella, Davao Del Norte, og mga panapton o bisti niadtong Enero 31.

Milibot ang mga Kuya ug Ate sa NEDNEC ngadto sa Brgy. Mambing, Sta. Fe, El Salvador ug Patrocenio alang sa pagpanghatag og mga gamit nga sarang masuot sa yanong benepisyaryo.

Gikuyogan ni Mayor Jorjan “Monet” B. Federiso ang maong grupo isip suporta sa pinasahi niining inisyatibo.
“Mapasalamaton kita sa Agila tungod sa ilang pagpaambit sa mga grasyang ilang naangkon ngadto sa mas labing nanginahanglan,” pasibaw ni Mayor Monet.

Malipayong gipangdawat sa mga residente ang wala damhang panalangin nga miabot kanila tungod kay adunay sila’y dugang magamit sa matag adlaw.

Ang maong kalihukan gimugna sa ‘The Fraternal Order of Eagles’, kansang pribadong asosasyon, isip kabahin sa ilang pagpanerbisyo sa komunidad.

| Warlie Loquinario

Pormal na nga gideklara sa Area Clearing Validation Board (ACVB) ang lima ka-barangay sa New Corella, Davao Del Norte, nga ‘cleared, peaceful, ug conflict-resilient communities’ Disyembre 18 didto sa Mabini, Davao De Oro.
Sa gipahitabong balidasyon, giduso sa kasundalohan ngadto sa ACVB nga ang barangay sa New Cortez, San Jose, Mambing, Cabidianan ug Sta. Fe sa lungsod malinawon ug lig-ong katilingban batok sa pagpanghasi sa mga komunistang teroristang grupo human mapulpog ang Guerilla Front 33 sa naulahi.

Ang ACVB gilangkoban sa armadong kusog sa nasud ug nasyunal pulis, nga gipangunahan sa Assistant Division Commander sa 10th Infantry (Agila) Division ug Deputy Regional Director for Operations sa Police Regional Office (PRO) XI, uban ang 10th ID TRIAD Staff Officers ug PNP-XI QUAD Staff Officers.

Gipresenta ang kahimtang sa kahapsay ug kalinaw sa matag-barangay, lakip ang mga nahimong lakang labot sa pagpatuman sa Community Service Program (CSP), mga ayuda sa nagkadaiyang panggamhanan, ug uban pang proyekto subay sa gilatid nga sumbanan alang sa maong deklarasyon.

Mihatag usab sa ilang testimonya ang mga kanhing masa o pangulo sa grupong gi-organisa sa armadong rebelde, mga hingtungdang kapitanes, ug representante sa New Corella Police Station.

“The motion to declare these five barangays as cleared, peaceful, and conflict-resilient is hereby approved,” pahayag ni BGen Maning S. Tawantawan, assistant division commander sa 10th ID.

Apil sa gipangdeklara sa ACVB ang pipila ka-barangay nga sakop sa Asuncion sa Davao Del Norte, ug Laak ug Montevista sa Davao De Oro.

Gipasalig usab ni BGen Tawantawan nga ilang suportahan ang inisyatibo sa pamunoang Federiso-Lagumbay sama sa Poverty Alleviation and Development for Rural Economy (PADRE), purok consultations, DUAW ug uban pang proyekto nga may kalambigitan sa pagpatunhay sa malahutayong kalinaw ug kalamboan sa lungsod.

Pormal nang gibuksan alang sa publiko ang Municipal Hall Flower Garden atubangan sa munisipyo pinaagi sa gipahitabong seremonyas sa pagbendisyon ug pagputol sa ribon karong gutloa.

“Atong gipagwapo ang atong munisipyo sama sa ka-gwapo ni Vice Mayor Jun,” pasiaw ni Mayor Monet Federiso.

“Ang tinuod gipagwapa kay gwapa man atoang mayora,” balos pakatawa ni Vice Mayor Jun Lagumbay.

Dugang pa sa mga opisyales nga igo lamang nila gibalik sa katawhan ang binayad nga buhis isip mga pinayalan pinaagi sa pagtunol og serbisyo, samtang gipasalamatan ang tanan.

“Kadtong nanaway, aw salamat. Pero kadtong midayeg, daghan kaayong salamat,” panapos ni Vice Mayor Jun.
Human sa seremonyas, mituyok ang mga opisyales matag-opisina alang sa thanksgiving ug pagbunot sa mga papremyo.

#MunicipalHallFlowerGardenInaguration
#SerbisyongTotooLoveKo
#FederisoLagumbayAdministration
#PadayonAngPaskongNewCorellahanon